Kamusta Na Kaya Sila?
Wednesday, April 4th, 2007“di man matagal ang pakikipagsama sa mga nakasalamuha, ala-ala nila’y mananatiling buhay sa isipan”
(March 27, 2007)
At minsan pang dumampi
Sa nanahimik na damdamin
Nagdaramihang mukha’t tinig
Kay dami nang nagdaan
Panahon, oras at taon
Pagkakataon at sitwasyon
Kaluwagan ang nararamdaman
Tuwing kalabit ng ala-ala nadaratnan
Kamusta na kaya sila?
Dumadampi kaya sa kanilang isipan
Ala-ala ng aking katauhan
Hindi na din mabilang
Ang mga paghamong dumating
Sumubok sa pagkatao at samahan
Itong buhay na parang blankong papel
Mga suliranin ang nagbigay kulay
Ang mga kaaya-ayang pangyayari
Sya namang nagbigay kahulagan
Kapatirang ginto kung itimbang
Kamusta na kaya sila?
Matimbang pa kaya sa kanila
Ang pangalan kong tangan
Iba-ibang landas na tinahak
Mga aninong naglaho sa dilim
Sumabay sa agos ng dagat
Tinangay ng hanging amihan
Mga paang sa ibayo pa lumakbay
Kapalarang dapat maisakatuparan
Sadyang malungkot isipin
Subalit ito ang nararapat sundin
Kamusta na kaya sila?
Itong kapalarang nais maisakatuparan
Sana’y taglay na nila ang tagumpay
